یہ بھی ایک حقیقت ہے کہ اگر لوگوں کو مثبت طریقے سے جنسی تعلیم نہیں ملتی تو وہ اپنے جنسی اعضاء سے کماحقہ واقفیت نہ ہونے کی بناء پر ان کے جائز استعمال سے بھی قاصر رہتے ہیں۔ بہت سے بے اولاد جوڑے صرف مثبت جنسی تعلیم کے فقدان کی وجہ سے ساری زندگی اولاد کی نعمت سے محروم رہتے ہیں۔ اور بعض دفعہ جنسی معلومات نہ ہونے کی وجہ سے حمل ضائع کر بیٹھتے ہیں۔ حالانکہ اگر معاشرے میں اپنے جنسی مسائل کو ڈسکس کر کے حل کرنے کی جرات ہو تو اس قسم کے مسائل بآسانی حل ہو سکتے ہیں۔
ہمارے معاشرے میں جہاں ایک طرف لوگ جائز و ناجائز کا علم نہ ہونے کے باعث نادانستگی میں اسلامی شریعت کی حدود پار کرتے جا رہے ہیں، وہیں یہ المیہ بھی موجود ہے کہ دوسری طرف بے شمار شادی شدہ جوڑے جنسی عدم اطمینان کی وجہ سے طلاقوں کا سامنا بھی کر رہے ہیں۔
ہمیں اس حقیقت کو تسلیم کر لینا چاہیئے کہ یہ سب کچھ مثبت جنسی تعلیم کی عدم دستیابی کی وجہ سے ہو رہا ہے۔ اگر لوگوں کو مثبت جنسی تعلیم دی جائے تو بے شمار لوگ اپنے جنسی مسائل کو خود حل کر سکتے ہیں اور بہت سے شادی شدہ جوڑے ایک دوسرے سے جنسی طور پر مطمئن ہو کر طلاق جیسی بدترین حماقت سے بچ سکتے ہیں۔